Matul ix-xahar ta’ April 2025, l-istudenti tal-Iskola Sekondarja tal-Kulleġġ San Benedittu f’Ħal Kirkop kellhom il-pjaċir jilqgħu grupp ta’ tmien studenti Franċiżi flimkien ma’ tliet għalliema tagħhom. Dan sar possibbli grazzi għal skambju li kien parti minn proġett Erasmus+ Mobility ikkoordinat mill-kap tan-network tal-Kulleġġ San Benedittu, Dr Roberta Argento. L-istudenti u l-għalliema tagħhom ġew mill-Liċeo Paul Verlaine, li jinsab f’Rethel fir-reġjun tal-Grand Est. Huma ġew Malta biex jipprattikaw il-lingwa Ingliża iżda wkoll biex jiskopru l-kultura Maltija. Fil-fatt, matul iż-żjara tagħhom f’Malta, huma żaru siti storiċi bħat-tempji ta’ Ħaġar Qim, il-belt kapitali Valletta, kif ukoll irħula tipiċi Maltin li jinsabu madwar l-iskola. Naturalment, matul għaxart ijiem l-istudenti attendew ukoll għall-lezzjonijiet flimkien mal-istudenti tal-iskola u ħadu sehem f’attivitajiet organizzati mill-iskola.