Nhar il-Ġimgħa, 4 ta’ April 2025, ġiet organizzata Serata Internazzjonali (International Night 2025) fis-sala tal-Kulleġġ Santa Tereża, Skola Medja, Ta’ Paris, Birkirkara. Il-kċina Franċiża kienet fil-qofol tal-attività permezz ta’ varjetà ta’ delikatezzi: il-famuża quiche Lorraine, tapenade, anchoïade, gallettini Breton, madeleines u, naturalment, il-macarons ikkuluriti. Dawn kollha ġew ippreparati mill-istudenti tal-Franċiż flimkien mal-għalliema tagħhom, is-Sinjura Deborah Mizzi. L-attività kienet suċċess kbir — id- diversi platti Franċiżi offruti intlaqgħu tajjeb mill-istudenti u l-ġenituri tagħhom.

Minbarra t-tidwiq tal-ikel, kull mistieden seta’ jagħżel bookmark imżejjen b’immaġini mill-isbaħ ta’ Franza. Dawn il-bookmarks, li kienu juru xeni differenti minn Franza, kienu apprezzati ħafna u servew bħala tifkira sabiħa ta’ din is-serata unika.

Din l-attività internazzjonali mhux biss iċċelebrat il-gastronomija Franċiża, iżda saħħet ukoll ir-rabtiet mill-qrib bejn l-istudenti, il-ġenituri tagħhom u l-għalliema!