Malta u l-Italja għandhom relazzjoni twila li tmur lura fiż-żmien bħala pajjiżi ġirien. Hemm ħafna rabtiet storiċi bejn iż-żewġ pajjiżi, iżda wkoll turistiċi u ekonomiċi. Id-distanza qasira bejn Malta u l-Italja għenet biex jinħolqu rabtiet matul is-snin u nies minn Sqallija u n-Nofsinhar tal-Italja stabbilixxew rwieħhom Malta. Dan ħalla impatt fuq il-lingwa mitkellma fl-arċipelagu Malti. Fl-1530, il-Kavallieri tal-Ordni ta’ San Ġwann ġew Malta u l-lingwa Taljana bdiet tintuża ħafna fil-gżejjer Maltin, peress li kienet tintuża għall-komunikazzjoni uffiċjali. Għal ħafna sekli wara, it-Taljan kien lingwa uffiċjali f’Malta sal-1934. Matul is-snin, kliem mid-djaletti reġjonali Taljani daħlu fil-lingwa Maltija u għadhom jintużaw fil-konversazzjonijiet ta’ kuljum.

Madwar id-dinja, it-Taljan huwa mitkellem minn aktar minn 80 miljun persuna. It-Taljan, bħala lingwa barranija, joffri opportunitajiet f’diversi oqsma, inklużi iżda mhux limitati għall-arkitettura, arti u restawr, disinn, inġinerija, moda, liġi, mużika, traduzzjoni, turiżmu u sports. Hemm ħafna kliem u espressjonijiet bit-Taljan li huma simili għal-lingwa Maltija u hemm kliem ieħor Taljan li jintuża spiss f’bosta lingwi, speċjalment vokabularju li huwa relatat mal-ikel, il-mużika u l-arti.